Pantun nasehat berbahasa Aceh

Pantun nasehat berbahasa Aceh

Bukonle chiet nanggroe Aceh
Leubeh-leubeh dalam dame
Peue ta peubuet rijang bereh
Tanle cungkeh ngon rammeune

Tajak u blang tabu bijeh
Hanie soe preh lakee “rune”
Jak lam paya mita leubeh
Tan soe cukeh lakee “beureune”

Tajak u laot eungkot ka teupreh
Buya ka jiweh lam umpung sane
Tajak u kanto meu-ato bereh
Peulom tatem peh deungon on “mane”

Korban tsunami karom gohlom ceh
Bereh han bereh got that meupa-e
Cit beule saba mangat bek stress
Doa beugigeh usaha beurame




Di laot pukat di darat moto
Ureung nyang mugoe pade meugunca
Ta meurakan bek beurangkaho
Ban dua uroe troh keunoe teuka

Peu meugrak-grak lam bak teubee
Aneuk ceurepee ateuh bak langsat
Jamee ban teuka pareksa dilee
Bekroh ji tipe oh lheueh duk pakat

Tajak ngon moto tawoe ngon tapak
Jalan ka rusak oh lheueh tsunami
Wahe syedara nyang na di barak
Nue jaga jarak ngon ureung teumaki

Buya krueng bandum teudong-dong
Buya ban tamoeng meuteume raseuki
Wahe syedara di kota ngon di gunong
Persatuan beukong peugadoh iri deungki

Aceh nyoe kaya Alhamdulillah
Ureung ibadah pujoe Rabbana
Limong boh watee geupujoe Allah
Poma ngon ayah sabee meudoa

Neubri nanggroe nyoe beu teutap ceudah
Makmu beubagah rakyat ubena
Bek na lee karu deungon musibah
Bek udeep gundah kawom sidumna

Gampong ngon banda bek na masalah
Nanggroe meutuah bek prang syedara
Kontak senjata bek lee na leumah
Bandum daerah damee beuteuka

Beuneupeu wujud wahe Ya Allah
Seuramoe Mekkah beu aman teuka
Awai kon rakyat rame yang punah
Subhanallah nyawong keuluwa

Ladom meuninggai meudarah-darah
Seudeh that leupah watee takira
Di dalam gampong nyan pih le parah
Aneuk deungon yah meuninggai donya

Ladom kawom ma udeep lam payah
Lakoe meutuah jinoe han lee na
Konflik seunjata rakyat le punah
Aneuk meupisah ngon ureung tuha

Dum aneuk yatim rata daerah
Gasien ngon susah lam ro ie mata
Udeep meupayeh saket meutamah
Ie mata darah cobaan teuka

Allahu Rabbi Nyang Maha Gagah
Bek lee musibah u Aceh Raya
Sinoe ngon sideh bek lee ro darah
Bek lee lam gundah ngon haro-hara

Neubri kamoe nyoe udeep beugagah
Akai beuceudah agam ngon dara
Cit Tuhan sidroe nyang kamoe seumbah
Nyang ridha Allah sabee keurija

Ban saboh Aceh beu sapeu peugah
Deuk ngon grah sama tarasa
Bahgia udeb keunan ta langkah
Pujoe Potallah bek sagai lupa

Aceh nyoe harom Seuramoe Mekkah
Nanggroe meutuah Tuhan karonya
Laot ngon darat kaya sileupah
Rahmat Potallah han soe ek kira

Sumber materikul dhany.blog spot