Kumpulan pantun - pantun aceh Agama Terbaru

Kumpulan pantun - pantun aceh Agama Terbaru

Ta baca yasin oeh lheuh seumbahyang

bak jum'at malam yang that mulia
Nue peu trang hate ban mandum insan
yang baca Qu'ran qalam Rabbana

mandum buet yang jroeh peujeut amalan
keu asoe badan beukai ta mita
ta keubah pangkai keu ngoen ta riwang
keudeh bak Tuhan u alam baqa

lhee boh amalan yang keukai sajan
bak tanyoe insan sampoe ta bungka
pahala sabe jile lam badan
dak lam kuburan mantoeng ta rasa

amai seudeukah watee saboh jan
ileumee Tuhan yang that meuguna
aneuk yang shaleh roeh cit di sinan
nyan keuh hai rakan ka lon peunyata..

----------------------------------------------

Hujeun gerimis sinoe di nanggroe
leupie lam asoe tuboeh semua
adak pih leupie gata bek beu oe
beudoeh hai adoe tajak keurija

yang cukop mangat kerja bak kanto
soek bajee baro bulut pih hana
teuma yang seudeh sabe meulabo
yang parkir moto bak jalan raya

watee musem khueng jitoet le uroe
sabe meulabo oeh hujeun teuka
asai glah makan si uroe - uroe
dak saket asoe hana ji kira

--------------------------------------------------------

Baro dua neuk Neu peutroen hujeun
ka beh ngoep bandum jalan di kota
padahai parek kalheuh di bangun
dak rayoek ruhueng hana meuguna

parek yang raya rab bineh teu gloeng
tapi ie teudoeng bak jalan raya
nyoe han neu pateh jeut neujak kaloen
toe ngoen teumpat lon jalan samudra

ureung ba honda sayang ta kaloen
keunepot ka noem ka mate honda
ka bulut busi ie ka ji tamoeng
payah geu dorong nyan honda supra..

------------------------------------------------------

Alahai adoe yang that meutuah
aneuk mak ngoen yah yang that geu cinta
pakoen keuh kajak hana ta peugah
hoe ka neuk langkah tan ka bri haba

pue tan le sayang keu mak ngoen ayah
ka ta peusosah ureung chik dua
rayoek that dosa adoe meutuah
nyoe ta peu gundah ayah ngoen poma

ngoen ureung gampong malee si leumpah
kareuna ulah gata hai dara
ka hek geusitoet lam nanggroe luwah
gata tan leumah meu bulee mata

tawoe hai adoe keudeh bak ayah
ta lakee meu'ah bak ayah ngoen ma
beuna ta pateh yang abang peugah
bek dudoe teulah gata dorhaka

-------------------------------------------------------

Hujeun ngoen kilat di lhokseumawe
takot bukoen le tubiet u lua
pajan ji pirang hanjeut ta takse
Po rabbul kade ka Neuboh masa

yang sijuek - sijuek limboet ngoen seupre
yang bakhe - bakhe jaroe dalam dalam pha
yang teungeut - teunget jak eh laju le
bek meugadang le malam ka jula

-----------------------------------------------------

Ta eu malam nyoe rame koen wayang
ureung bak jalan meu banja - banja
mandum beurangkat jak eu piasan
nonton hiburan sideh di kota

lon deungoe haba artis ji undang
grup lagu PAS BAND deungoen GEISHA
teumpat acara jalan sudirman
jeum bak poh lapan mula acara

bek sagai tuwoe tragedi silam
ingat hai rakan meubek ta lupa
bak malam minggu lagee nyoe saban
geutanyoe insan lalee lam dosa

bala yang leupah bek le ta undang
bek le meuriwang musibah teuka
bek that peuturoet buet ikoet syaitan
azeub bak Tuhan cukoep bahaya

beuna keuh sadar tanyoe hai insan
umat iseulam yang na lam donya
jineuk peuhanco agama islam
meumacam ragam ji mita cara

-------------------------------------------------

Cinta lon teutap keu sidroe gata
sampoe oeh tuha sampoe oeh mate
dak awai kaya dudoe ka papa
teutap lon cinta gata boh hate

hana lon pandang bak tari rupa
tutoe bahasa nyan yang meusampe
keupue dak tari lagee hindia
sabe tiep masa peusaket hate

 INGAT KEU MATE

Kumang seulanga duroh bak tangke..
Kumang bungong pade oh watee senja..
Hudep didonya meubek laloe le..
Ingat keu mate kan geutanyoe rasa..

Gasien ngoen kaya petani ngoen toke..
Tungku ngoen lonte nyan chit dirasa..
Ngen piasan donya laloe bukon le..
Singoh oh mate sapeu tan taba..

Gudong meutingkat rumoh meu uke..
Moto ngen honda cb tinggai lam donya..
Inoeng lagak that pawoen ngen doble..
Cuma oh sampe kuburan diba..

Lhee boh peukara yang akan dile..
Amai sabe be pahala tarasa..
Adak ngen donya tanyoe ka meucre..
Teutap kan sampe amalan teuka..

Seudeukah jariah lampoh deungen gle..
Wakaf peu ase bantu agama..
Pahla meulimpah sampoe an page..
Troek uroe akhe tanyoe bahgia..

Ileumee manfaat didalam hate..
Tapeurunoe sare adak aleh ba..
Seulama meukumat di amai sabe..
Pahla meu gule keu tanyoe ta rasa..

Aneuk yang saleh teuma yang akhe..
Pangkai tamate taharap do'a..
Dinoe peumeukleh u dayah ta use..
Bek lagee bude aneuk tapeulara..

::: MITA LAKOE :::

Pantoen loen karang nibak uroe nyoe..
Keu perte putroe ngen aneuk dara..
Bak pileh cut abang tamita lakoe..
Bek teulah dudoe hana le guna..

Yang phon ta cari yang tem meurunoe..
Dayah geuputoe menuntut agama..
Adak tan gaji bek that ta pakoe..
Yang peunteng tanyoe hudep bahgia..

Teuma keudua bak mita lakoe..
Sabu ngen bakong asoe meubek dicoba..
Nye kameuraba nyan lumpah paloe..
Keluarga pheng phoe sabe meudawa..

Meunye yang keulhee wahe e adoe..
Ta eu keuh sidroe agam yang setia..
Bek diteurajee ho yang galak droe..
Oh hana tanyoe ka lam rumoh janda..

Masalah keu peut beuna buet jaroe..
Bek peng manteng cakoe bak ayah poma..
Supaya di pruet sabe tarasa troe..
Ngak ek tapujoe ibadah keu yang Kuasa..

Nye yang keulimeng bacuet loen sampoe..
Agam yang bek laloe tanggong jaweub beuna..
Meunye tateurimeng agam lagee nyoe..
Han dikubah sidroe seudeh ngen bahgia..

Bek salah raba bak mita lakoe..
Asai moto dibloe ka tateurimeng saja..
Adak bahagia hudep dibumoe..
Keupeu hai adoe ileumee hana...

 

:: KEUREUJA :::

Nibak uroe nyoe dikamoe keureuja...
Mita rupia saboh glah ie kupi...
Jak peu ek anoe pat yang na sisa...
Dalam blang raya abeh meu ungki...

Teuma dirakan ngen Marga paya...
Digob nyan yang ba dan yang jok gaji...
Rama ramadan nyan keuh anggota...
Gobnyan saudara awak mat bangki...

Teuma Da maneh gob nyan ketua...
Ngen bajee PA keunan geu ili...
Geudong dimineh angkot angkot saja...
Rukok geuputa sira boet guni...

Di Al Luvi cucok yang peugot cakra...
Nibak keureuja semangat sekali...
Gadoh meucagok ngen Marga paya...
Golom poh dua ka lakee bu guri...

Ureung phok sumen Munadi Al muna...
Geubantu sigra le aduen Jufri...
Meunye nibak sen digobnyan dua...
Geutem kerah tenaga ubena dali...

Meunye di uloen bek that neukira...
Nye nyan keureuja chit sigoe giti...
Lale karang pantoen ide ta mita...
Diyub jambo tuha ata abi syapari...

Moden siluweu nan merek pasha...
Watee ta ue pha jeut cungke gusi...
Bak keureuja haleu kamoe jak mita...
Hana hai saudara riba meucari...

Jazk- aLhamdulilLah uroE nyoE ka gLah keu ie kupi... Pujoe kEu Rabbi daLam haTi syukuR tHat rayA...

 

:: UROE RAYA HAJI :::

Kutilang meunari di ateuh bak jok..
Ticem meurubok ateuh bak panjoe..
Uroe raya haji teuma karap troek..
Meu saboh bajee brok hana meugantoe..

Tajak keureuja rab teulheup rusok..
Nye buet meuadok nyan ka tiep uroe..
Tapi rupia oh watee geujok..
Hanseb meu beok keu bakong asoe..

Yang na chit utang laju meutumpok..
Sikhan kupi tubrok han ase ta bloe..
Keu sie makmugang payah pegot landok..
Tapreh situmpok kurbeun si taloe..

Silop bak gaki yang ka uloen sok..
Sige treuk batok jeut lhat bak bak panjoe..
Dak tapreh gaji tukang that meurabok..
Sabe loen theun plok hana geupakoe..

Teuma asoe dompet cit ka cukop lhok..
Yang na sigot ok ngen poto dek putroe..
Cewek ka meurepet peugah hp sibok..
Padahai adek oek pulsa hana ngen pasoe..

Tadrob daruet kleng bak naleung tasok..
Boh panah tatubok nye mangat asoe..
Ho loem takeureuleng uroe raya katrok..
Ngak na peng tajok keu mak ngen adoe..

::: JOMBLO :::

Boh mamplam kulek talawok lincah..
Campli peu bicah sira ta jampu..
Yang hana cewek meulumpah susah..
Tijoh ie babah oh malam minggu..

Nasib di jomblo cuma jeut pasrah..
Katreb meulumpah hana soe rindu..
Hana soe ato hana soe peugah..
Karna dikubah ka lhee goe pemilu..

Pesan di fb bacuet loen peugah..
Rata wilayah cewek jak rayu..
Dak hana dituri langsong di olah..
Meusidroe han dibalah si adek mulu..

Tapi usaha han toem menyerah..
Meuheut meulumpah peugah I lop piyu..
Rata aneuk dara limboi yu kubah..
Adak dibalah lon pakek hp abu..

Padahai alasan sidara ceudah..
Takot bang basyah teuka cemburu..
Adak kirem pesan hanjeut lupah lupah..
Dijomblo meutuah geulantak laju..

Tapreh oh beungeh di apa basyah..
Meulumpah marah geulakee tinju..
Geupeugah geupreh peuputoh masalah..
Meubek le dikah cewek nyan ka rayu..

Manyang dicong u na umpung tiwah..
Aneuk manteng mirah sibok dimusu..
Watee malam minggu meudo'a bak Allah..
Ujeun beubagah beujitron laju..

Jazk- yaNg jombLo bEk seUdeh haTe...karNa yAng pacAran tiEp urOe meUpake...

Sumber

(pantun seribu)

Pemantun : Rizki Jazk Muhamad